Ýarym bilen gideýin

Ýarym gitdi derýa bilen aýlanyp,
Goýber, Ahun, ýarym bilen gideýin!
Ilsiz-günsüz bir sandyga jaýlanyp,
Goýber, Mollam, ýarym bilen gideýin!

Ýarym gitdi, jan riştesi üzüldi,
Bagrym kebap bolup, çişe düzüldi,
Ejiz boldum, başym şuma ýazyldy,
Goýber, Mollam, ýarym bilen gideýin!

Derýa atdy dur nukranyň gaşyny,
Haýsy balyk ýutdy eziz läşini.
Çäräm ýokdur atam kylan işini,
Goýber, Ahun, ýarym bilen gideýin!

Ýa bu meýdan içre öldürgil meni,
Başymga salmagyl aýralyk güni,
Kyýamatlyk atam, diýmişem seni,
Goýber, Mollam, ýarym bilen gideýin!

Zöhre diýer, gül ýüzümde hyjapdyr.
Yşk ryswasy bolup, bagrym kebapdyr,
Bu aýralyk ölmegimge sebäpdir,
Goýber, Mollam, ýarym bilen gideýin!

Mollanepes [Zöhre-Tahyr]