Läle getirmiş

Asmandan nur ýagsa, münewwer bolar,
Zemin ýaşyl geýip, läle getirmiş
Huda buýrugyndan aýrylan juwan –
Oýnaşyndan haram köle getirmiş.

Owwal akan ýerden akarmyş aryk,
Men-menlik edeniň tanapy çüýrük,
Mertden aşna tutsaň, abraýňa şärik,
Namart aşnasyna hile getirmiş.

Her kim gezer bu dünýäde bir hile,
Ýörgün ata-baba ýörigen ýola,
Baýtal ýapagysyn çekermiş çöle,
Eşek kürresini küle getirmiş.

Her kim öz adyna möhür gazdyrar,
Ýazylan takdyry kimse bozdurar,
Ikiniň sylagy birin azdyrar,
Taýak bir dälini ýola getirmiş.

Magtymguly, ger doýursaň bir ajy,
Mälimdir, tapar sen bu ýerde hajy,
Näge mertlik etse adam biweji,
Her mejlisde ýüz ýol tile getirmiş.

Magtymguly