Saňa garaşýan

Otly kimin geçip barýar bu günler,
Diňe men şu ýerde saňa garaşýan.
Ýatlama öwrüldi häli hem düýnler,
Diňe men şu ýerde saňa garaşýan.

Hazan geldi, gül ýüzümiz saraldy,
Ýalňyz galyp dünýämiz hem daraldy,
Diňe gaýgy bize wepadar boldy,
Diňe men şu ýerde saňa garaşýan.

Talyp bolup gitsemde men ýurt aşyp,
Çilleler geçirdim saňa garaşyp,
Göçüp barýan bulutlardan soraşyp,
Diňe men şu ýerde saňa garaşýan.

Aýralyk derdi ýamandyr aman!,
Aşygy öldürer gelse her zaman,
Başyma düşsede tükenmez güman,
Diňe men şu ýerde saňa garaşýan.

Gyş geldi, ýer ak köýnegin geýindi,
Gara bulut goja daga söýendi,
Seni ýatlap ýaş ýüregim oýandy,
Diňe men şu ýerde saňa garaşýan.

Men garaşýan, gar ýagyp dur üstümden,
Söýgimden dänmerin aýdam rastymdan,
Eger ot bitäýse aýak astymdan,
Diňe men şu ýerde saňa garaşýan.

Amangeldi Rähşa